Emoción e compromiso no segundo ano do pasamento de Carmelo Teixeiro. In Memoriam

NALGURES

Nalgures andarás, nalgunha guerra,

quizais nunha cidade destruída

osmando entre os cadáveres a vida,

que o oficio de vivir nunca te aterra.

Sempre a loitar coa xente que se aferra

aos soños e que aposta na partida

non dando nunca a causa por perdida

loitando sempre polo mar e a terra

Pintando arcos da vella na tormenta,

liñas pintadas coma pontes,

cousas de non matar e bolboretas,

así te podo ver, sempre á mantenta

onde se movan máis os horizontes,

que as ondas do teu mar nunca están quietas.

Marica Campo

Radio Rexurdimento.gal, únese na lembranza a un home íntegro e comprometido coa Humanidade, aos benqueridos amigos e compañeiros da Asociación Cultural "Fuco Buxán", do "Comité Cidadán de Emerxencia para a Ría de Ferrol", e ao conxunto da cidadanía.

In Memoriam.